Zëvendësministri i Bujqësisë, Pylltarisë dhe Ekonomisë së Ujërave, Albrim Hoxha, vizitoi panairin ndërkombëtar ZEPS 2026 në Zenicë, një nga ngjarjet më të rëndësishme ekonomike dhe të biznesit në Bosnjë dhe Hercegovinë.
ZEPS 2026 këtë vit bashkon mbi 500 ekspozues nga vende të ndryshme, duke krijuar një platformë për prezantimin e kompanive, produkteve dhe teknologjive, si dhe për takime biznesi, investime dhe krijimin e partneriteteve të reja.
Gjatë vizitës, Hoxha u njoh nga afër me organizimin dhe konceptin e panairit, ndërsa me drejtuesit e ZEPS-it bisedoi për mundësitë e vendosjes së bashkëpunimit dhe për pjesëmarrjen e kompanive nga Maqedonia e Veriut në edicionet e ardhshme.
Fokus i veçantë iu kushtua mundësisë për prezantimin e prodhuesve bujqësorë dhe kompanive agro-ushqimore nga Maqedonia e Veriut, si një mundësi për promovimin e produkteve vendase, krijimin e kontakteve të drejtpërdrejta me partnerë të rinj dhe hapjen e tregjeve të reja në rajon.
Në biseda u shkëmbyen përvoja edhe rreth mundësisë së zhvillimit të formateve të ngjashme të panaireve në Maqedoninë e Veriut, të cilat do të bashkonin prodhuesit, kompanitë, institucionet dhe partnerët ndërkombëtarë në një platformë të përbashkët ekonomike dhe promovuese.
Hoxha falënderoi Sanel Ibrić, drejtor ekzekutiv dhe menaxher i ZEPS-it, për mikpritjen, shoqërimin gjatë panairit dhe gatishmërinë për zhvillimin e bashkëpunimit.
Vizita në Zenicë u përmbyll me një takim dhe bisedë me Samir Šibonjić, ministër i Ekonomisë i Kantonit Zenicë-Doboj, ku u diskutua për mundësitë e forcimit të bashkëpunimit ekonomik dhe krijimin e lidhjeve të reja ndërmjet kompanive dhe prodhuesve nga të dy vendet.
