Македонија во 2018 година ќе биде партнер на Интернационалниот саем за земјоделство и храна во Словенија
Дата на објава: 
26 Август 2017
IMG-20170826-WA0004.jpg

Македонија следната година ќе биде земја партнер на 56-от Интернационален саем за земјоделство и храна „AGRA“, што секоја година се одржува во Горна Радгона, во Словенија. Годинава партнер на саемот беше Народната Република Кина. Поканата за партнерство, денеска на македонскиот министер за земјоделство, шумарство и водостопанство, му ја врачи заменик-претседателот на Владата и министер за земјоделство, шумарство и храна на Република Словенија, Дејан Жидан.

Ова е голем успех за Македонија, ако се има во предвид дека се работи за еден од најголемите интернационални саеми во Централна и Источна Европа, на кој присуствуваат ресорните министри од земјите од Централна и Источна Европа. Исто така ваквото партнерство е можност за подобро претставување на македонските земјоделски производи пред странските производители и промоција на македонското земјоделско производство.


Словенија ќе и помага на Македонија во јакнење на Платежната агенција и советодавните служби за земјоделците
Дата на објава: 
25 Август 2017
21104295_10156039234890628_2024904907_o.jpg

Министерот за земјоделство, шумарство и водостопанство Љупчо Николовски оствари средба со заменик-претседателот на Владата и министер за земјоделство, шумарство и храна на Република Словенија, Дејан Жидан, во Брдо кај Крањ, Словенија. На средбата е договорена  помош од Република Словенија во евроинтеграцискиот процес на Република Македонија. Министерот Жидан, истакна дека Република Словенија стои на располагање за помош во делот на подобрување на функционирањето на македонската Агенција за финансиска поддршка во земјоделството и руралниот развој, како институција која е важна за распределбата на националните и европските пари. Исто така Министерот Жидан посочи дека Република Словенија ќе помогне во јакнењето на советодавните служби за земјоделците во Република Македонија, како на Агенцијата за поттикнување на развојот на земјоделството и руралниот развој, но и на приватните советодавни служби.


Mинистрите од Централна и Источна Европа и од НР Кина усвоија декларација за унапредување на трговската соработка
Дата на објава: 
25 Август 2017
21146247_10156038683880628_1633770182_o.jpg

Министрите од Централна и Источна Европа и од НР Кина на денешниот 12-ти „Форум за агро-трговија и економска соработка“ во Брдо кај Крањ, Словенија, ја усвоија заедничката декларација за „Улогата на меѓународната трговија и синџирот за снабдување со храна на локално и глобално ниво“.

На денешниот состанок министрите за земјоделство од Централна и Источна Европа и од НР Кина кои се дел од платформата за соработка во областа на земјоделството  „16+1“, дискутираа за напредокот на соработката во областа на земјоделство во текот на изминатата  година. Министрите позитивно ги оценија реализираните активности врз основа на упатствата од Рига за соработка помеѓу земјите од Централна и Источна Европа и НР Кина и среднорочната Агенда за меѓусебна соработка.


МЗШВ: Рокот за аплицирање за субвенции од Програмата за 2017-та е до 15-ти септември, а за мерката Млад земјоделец до 29 август
Дата на објава: 
24 Август 2017

Министерството за земјоделство, шумарство и водостопанство ги известува земјоделците, дека рокот за  поднесување барања за субвенции за земјоделство од Програмата за финансиска поддршка во земјоделството за 2017 година, кој почна на 3-ти јули годинава, трае до 15 септември 2017 година.

Земјоделците можат сами да поднесат барање за директни плаќања преку Е-Барање кое е поставено на страната на Агенцијата за финансиска поддршка во земјоделството и руралниот развој.

Оние земјоделци кои не се во можност сами да си креираат барање, најдоцна до 30 Август годинава треба да побараат техничка поддршка од Подрачната единица на Министерството за земјоделство, шумарство и водостопанство, за да можат да го запазат рокот за аплицирање на 15 септември. За помош околу аплицирањето земјоделците можат да ги користат и услугите на Агенцијата за поттикнување и развој на земјоделството.


Министерот Николовски ќе учествува на Форумот за агро-трговија и економска соработка во Словенија
Дата на објава: 
24 Август 2017

Министерот за земјоделство, шумарство и водостопанство Љупчо Николовски, од денеска  до 26-ти август, ќе учествува на 12-иот  „Форум за агро-трговија и економска соработка помеѓу земјите од Централна и Источна Европа и НР Кина“, што годинава се одржува во Брдо кај Крањ, Словенија.  Форумот е во рамки на 55-тото издание на Саемот за храна и земјоделство „AGRA FAIR 2017“ што се одржува во Горња Радгона, Словенија.

Како клучен настан кој годинава ќе го одбележи саемот е токму официјалната средба во рамките форумот и на иницијативата „16+1“ помеѓу земјите од Југоисточна Европа и Народна Република Кина,.

 

На утрешниот состанок министрите за земјоделство од Централна и Источна Европа и од НР Кина, ќе ја промовираат иницијативата „16+1“ чиј што дел е и Република Македонија, со цел да се зајакне билатералната и мултилатералната размена и да се даде заеднички одговор на главните предизвици за понатамошен развој на трговијата со земјоделски производи помеѓу НР Кина и земјите од Централна и Источна Европа.


Syndicate content